Libreng sakay ng Manila LGU, mas dumami pa

MANILA, Philippines – Mas lalo pang dumami ang bilang ng tumangkilik sa libreng sakay program ng pamahalaang lungsod ng Maynila.

Batay sa pinakahuling datos ng Manila LGU, umabot na sa 213,599 ang mga pasahero na naserbisyuhan ng handog na libreng sakay program.

Ito ay naitala nitong Abril 7, 2026 hanggang alas-9 ng gabi sa tulong na rin ng 1,118 aktibong mga jeepney na bumibiyahe sa iba’t ibang panig ng Maynila.

Nauna nang sinabi ni Manila Mayor Isko Moreno-Domagoso na nadagdagan ang mga ruta ng mga jeep sa libreng sakay para maikutan ang lahat ng bahagi ng Maynila.

Samantala, dinagdagan din ni Mayor Isko ang matatanggap ng mga tsuper na kabilang sa Libreng Pamasahe Program kasunod ng P18 na pagtaas sa presyo ng diesel nitong Abril 7.

Ayon sa alkalde, mula P3,500 ay magiging P4,000 na ang matatanggap ng mga jeepney driver.

Ang Libreng Sakay program ng pamahalaang lungsod ng Maynila ay may kasamang mga tauhan ng Manila Traffic and Parking Bureau (MTPB) upang masiguro na nagbibigay ng tamang serbisyo ang mga jeepney na kasama sa nasabing programa. (Jocelyn Tabangcura-Domenden)