MANILA, Philippines – Iniulat ng PAGASA ang tatlong weather system na magdadala ng mga pag-ulan at pagkidlat-pagkulog sa ilang bahagi ng bansa sa Biyernes.
Ang Low Pressure Area (LPA), dating tropical depression “Querubin,” ay malapit sa Camiguin at magdudulot ng kalat-kalat na pag-ulan sa Visayas, Mindanao, at Palawan, na may panganib ng flash flood at landslide dahil sa katamtaman hanggang sa malakas na pag-ulan.
Samantala, ang Shear Line ay magdadala ng maulap na kalangitan at kalat-kalat na pag-ulan sa Bicol, Quezon, at ilang bahagi ng MIMAROPA.
Maaapektuhan naman ng Northeast Monsoon ang Cagayan Valley, Cordillera, at Aurora, na magdadala rin ng katamtaman hanggang sa malakas na pag-ulan na may posibleng pagbaha.
Ang Metro Manila at karamihan sa Luzon ay makakaranas ng mahinang pag-ulan na walang makabuluhang epekto, ngunit inaasahan ang malakas na hangin at maalon na karagatan sa hilagang at kanlurang bahagi ng Northern Luzon. RNT
