Nagbabala ang Land Transportation Franchising and Regulatory Board (LTFRB) sa mga kumpanya ng bus laban sa paniningil sa mga pasahero para sa paggamit ng kanilang mga comfort room sa kanilang mga terminal, sa pagsasabing dapat ay walang bayad ang mga sanitary facility batay sa umiiral na mga regulasyon.
Nagbigay ng babala si LTFRB chairperson Teofilo Guadiz III matapos matuklasan sa mga surprise inspection sa Metro Manila bus terminals na ilang bus terminal ang naniningil sa mga pasahero ng hindi bababa sa P5 para sa paggamit ng mga comfort room.
“Ang pagkolekta ng mga bayarin para ma-access ang mga sanitary facility ay ipinagbabawal. Ang pag-access at paggamit ng mga sanitary facility sa lahat ng mga terminal, ang mga istasyon ay dapat na libre sa lahat ng pasilidad ng transportasyon sa lupa,” ani Guadiz.
Ang paniningil sa mga pasahero para sa paggamit ng comfort room sa mga bus terminal ay matagal nang nakasanayan hanggang sa puntong ito ay itinuturing na bilang normal sa gitna ng pagkabigo ng gobyerno na mahigpit na ipatupad ito.
Bukod sa libreng access sa mga comfort room, sinabi ni Guadiz na ang mga kumpanya ng bus ay dapat ding magtalaga ng mga priority/express lane at maglagay ng mga diaper-changing table sa loob ng mga banyo sa loob ng bus terminal.
Aniya, ang iba pang kinakailangan para sa mga terminal ng public utility vehicle ay kinabibilangan ng global navigation satellite system (GNSS), closed-circuit television (CCTV) na may tuluy-tuloy na recording ng nakalipas na 72 oras na operasyon, valid fire extinguisher para sa bawat unit at bawat bus terminal.
Sinabi pa ni Guadiz sa mga terminal operator na isama ang probisyon para sa walk-through metal detectors at o handheld metal detector. RNT
