LTFRB naglabas ng SCO vs operator ng bus na sangkot sa aksidente sa Quezon

MANILA, Philippines – Alinsunod sa utos ni Pangulong Ferdinand “Bongbong” R. Marcos, Jr. na magpatupad ng mga hakbang upang matiyak ang kaligtasan sa kalsada, ipinatawag ng Land Transportation Franchising and Regulatory Board (LTFRB), sa ilalim ng gabay ni DOTr Secretary Giovanni “Banoy” Z. Lopez, ang operator ng isang pampasaherong bus na nasangkot sa aksidente sa kalsada sa Gumaca, Quezon.

Hindi bababa sa 25 pasahero ang nasugatan sa insidente at nais ni LTFRB Chairperson Atty. Vigor D. Mendoza II na alamin kung ano ang naging sanhi, lalo na’t may ulat na nawalan ng kontrol ang drayber ng bus.

“Isinasagawa namin ang isang imbestigasyon upang matukoy ang dahilan sa likod ng hindi magandang pangyayaring ito. Ito ba ay isyu sa road worthiness, isyu sa drayber, o ibang dahilan,” sabi ni Chairperson Mendoza.

Batay sa paunang ulat, nakita ng mga saksi na tila nawalan ng kontrol ang bus sa kahabaan ng pambansang highway. Pagkatapos, bumangga ito sa isa pang sasakyan.

Dinala sa ospital ang mga nasugatan.

Sinabi ni Mendoza na inutusan ang operator ng passenger bus na magsumite ng nakasulat na paliwanag kung bakit hindi dapat suspendihin o bawiin ang kanilang prangkisa kaugnay ng insidente.

Inatasan din ang operator na humarap sa LTFRB para sa isang pagdinig na nakatakda sa Marso 13.

Sinabi niya na babantayan ng LTFRB ang progreso ng pagbabayad ng insurance para sa lahat ng nasugatang pasahero.

Tiniyak ni Mendoza ang patas na pagdinig sa insidente, na nagsasabing agad na kikilos ang LTFRB sa kaso. Santi Celario