MANILA – Binalaan ng Land Transportation Office (LTO) Chief, Assistant Secretary Vigor Mendoza II, ang kanyang mga empleyado laban sa pakikipagsabwatan sa mga “fixer” o mahaharap sa administrative sanctions kabilang ang pagkawala ng kanilang mga trabaho.
Ginawa ito ni Mendoza matapos maimbestigahan ang tatlong tauhan ng LTO, kabilang ang isang district office head, dahil sa umano’y pagkakasangkot sa mga iligal na transaksyon sa mga fixer o mga tao sa labas ng LTO na nag-aalok ng mas mabilis na transaksyon kapalit ng bayad.
“Noong unang araw pa lang ng pagiging LTO Chief, nilinaw ko na lahat ng fixers at mga katropa nila sa ating ahensya ang tatakbuhan ko. Hindi namin hahayaan ang mga taong ito na madungisan ang pangalan ng aming ahensya para sa kanilang mga iskema sa paggawa ng pera,” aniya sa isang pahayag.
Noong Martes, nagsagawa ng dalawang magkahiwalay na operasyon ang LTO at mga partners in law enforcement malapit sa LTO Central Office sa Quezon City at sa Bulacan dahil sa kumpirmadong intelligence report ng mga empleyadong nagtatrabaho sa mga fixer.
Ang operasyon sa Bulacan ay nagresulta sa pagkakaaresto sa isang fixer na nagngangalang Michael Mendoza at tatlong empleyado ng LTO.
Noong araw ding iyon, inaresto ng mga intelligence agent ng LTO at mga operatiba ng Criminal Investigation and Detection Group (CIDG) ang 40-anyos na si Desire Daginod dahil sa umano’y pag-alok ng mabilis na pag-iisyu ng driver’s license sa isinagawang entrapment operation sa Barangay Pinyahan, Quezon City.
Napag-alamang nag-a-advertise si Daginod ng kanyang mga ilegal na serbisyo sa pamamagitan ng Facebook.
Ang isa pang suspek na sangkot kay Daginod, na kinilalang si Gerlo Gomez, 35, ay nakaiwas sa pagkakaaresto. RNT
