MANILA, Philippines – Patay ang tatlong batang babae matapos malunod habang naliligo sa ilog sa Bulan, Sorsogon nitong Sabado, Nobyembre 2.
Sa panayam, kinumpirma ng Bulan police na nasawi nga ang 9-anyos na batang babae at dalawa nitong kaibigan na kapwa edad 8, nang malunod sa ilog sa Barangay Abad Santos bandang alas-10 ng umaga.
Sinubukan pang sagipin ng mga residente ang tatlo ngunit patay na ang mga ito nang maiahon sa ilog.
Dinala sa ospital ng mga rumesponde ang tatlong biktima ngunit dahil sa layo ay idineklara na ang mga ito na dead on arrival.
Sa impormasyon, tinangay ng malakas na agos ang tatlong bata patungo sa mas malalim na bahagi ng ilog.
Nakipag-ugnayan na ang Bulan police sa mga barangay official sa Abad Santos para ipagbawal ang paliligo sa ilog.
Ito ang kauna-unahang drowning incident na naitala sa lugar. RNT/JGC
