MANILA, Philippines – Inaasahan ng Department of Justice (DOJ) ang isang “major development” ngayong taon kaugnay ng extradition request ng United States para kay Kingdom of Jesus Christ (KOJC) founder Apollo Quiboloy.
Ayon kay Quezon 4th District Rep. Keith Micah Tan, ito ang commitment ng DOJ sa isinagawang budget deliberations sa Kamara.
“Ang commitment po ng DOJ is this year po may major accomplishment po ang ating DOJ with regard to that matter,” ani Tan.
Tumugon naman si Akbayan Party-list Rep. Percival Cendaña na pananagutin nila ang DOJ sa naturang commitment at inaasahang magkakaroon ng malaking development sa extradition ni Quiboloy ngayong taon.
Kasalukuyang nakakulong si Quiboloy sa Pasig dahil sa hiwalay na mga kaso. Nahaharap din siya sa mga kasong kriminal sa California, kabilang ang conspiracy to engage in sex trafficking by force, fraud, and coercion.
Noong Agosto, pormal na hiniling ng US government ang extradition ni Quiboloy. Ayon sa DOJ, matapos ang pagsusuri ay ihahain ang kahilingan sa Regional Trial Court (RTC), na siyang magpapasya kung ito ay pagbibigyan o tatanggihan. RNT/MDS
