MANILA, Philippines – TILA napika na si Presidential Communications Office Undersecretary at Palace Press Officer Claire Castro sa paulit-ulit na tanong sa kanya hinggil sa kahilingan na magpa-hair follicle test si Pangulong Ferdinand Marcos Jr.
Sinabi ni Castro na fake ang polvoron video na inilabas ni si dating presidential spokesperson Harry Roque.
Pinalabas kasi sa naturang video na gumagamit ng “cocaine” ang presidente na tinawag ngang “polvoron” dahil sa halos magkapareho nga ang mga itsura nito.
“Ulit-ulit, paulit-ulit. Uulit-ulitin ko, uulit-ulitin natin, peke ang video na siyang isiniwalat nitong si Atty. Harry Roque. Dapat pa ba natin siyang paniwalaan? Uulit-ulitin ko, paulit-ulit na lamang siya,” ang sinabi ni Castro sabay sabing “Paulit-ulit po ulit? Hair follicle test po ulit?.”
Matatandaang, tinabla ni Pangulong Marcos ang hamon ni dating Exceuitve Secretary Vic Rodrigguez na sumailalim ang una sa hair follicle test.
Kumbinsido ang Pangulo na walang kinalaman ang hair follicle test sa iginigiit ni Rodriguez na ‘public office is a public trust.’
Ang hamon ni Rodriguez ay kaugnay aniya sa paggamit umano ng ilegal na droga ni Pangulong Marcos.
Giit pa ni Marcos, kung papaniwalaan ang sinasabi ni Rodriguez ay bakit pa ito nagtrabaho sa kanya.
Si Rodriguez ay nagsilbing Executive Sectetary ni Pangulong Marcos sa unang buwan ng panunungkulan sa Malakanyang. Kris Jose
