Malawakang pagkalbo ng Sierra Madre, pinaiimbestigahan

DINAPIGUE, Isabela – Nanawagan ang mga residente, kabilang na ang mga Indigenous Peoples, religious sector, at Non-Government Organizations (NGOs) sa bayan ng Dinapigue, Isabela na itigil na ang walang habas na panggagahasa sa inang kalikasan o pagkalbo ng kabundukan sa bahagi ng Sierra Madre dahil sa patuloy na pagmimina sa lugar.

Kaya’t iminungkahi ni Mayor Vicente Mendoza ang agarang imbestigasyon matapos ang panawagan ng kanyang mga kababayan na pansamantalang itigil ang operasyon ng Dinapigue Mining Corporation (DMC), na umani ng batikos dahil sa sinasabing deforestation sa Sierra Madre.

Labinglimang taon nang nag-o-operate ang nasabing mining company na mayroon pang sampung taon na natitira sa kontrata. Ayon sa mga residente, posibleng mabura sa mapa ng Pilipinas ang bayan ng Dinapigue—na bahagi ng coastal town ng Isabela—kapag nagpatuloy ang pagmimina.

Ang kinalbong kagubatan ng DMC sa bahagi ng Sierra Madre ay nagsisilbing panangga sa tuwing may malalakas na bagyo, lalo na’t paparating na naman ang mga buwan ng “ber” na posibleng magdulot ng malawakang pagbaha at pagguho ng lupa mula sa kabundukan.

Kaya’t agarang aksyon ang sigaw ng mga residente. Hindi lamang dapat “silipin,” gaya ng sinabi ni Gov. Rodito Albano III, kundi dapat ding imbestigahan ang walang habas na pagsira sa bahagi ng Sierra Madre.