Manileño saksi sa legasiya ni Isko Moreno: ‘Walang nagutom sa Maynila noong pandemya’

MANILA, Philippines – Ipinagkibit-balikat na lamang ni dating Manila Mayor Isko Moreno Domagoso ang mga ibinabatong pambabatikos sa kanya ng kanyang mga katunggali kasabay ng paghugot nito ng lakas mula sa mga tunay na Manileño na mga mamamayang saksi mismo sa kanyang pamumuno at mga nagawa para sa lungsod.

Sa naganap proclamation rally ng kanyang slate na “Yorme’s Choice” sa Moriones Street, Tondo noong Biyernes ng gabi, kumpiyansa si Domagoso na patas siyang huhusgahan ng mga taong kanyang pinagsilbihan, lalo na noong kasagsagan ng pandemya.

“Marami-rami na akong testigo, kayong mga naparito, testigong buhay, matangos ang ilong nating maipagmamalaki,” ani Domagoso sa harap ng libo-libong Manileño na dumagsa sa proclamation rally.

“Noong panahon ng pandemya, walang nagutom sa Lungsod ng Maynila,” paalala ng dating alkalde sa isinagawang COVID-19 Food Security Program ng kanyang administrasyon.

Isa ang naturang programa sa mga pangunahing inisyatiba ng kanyang administrasyon upang tugunan ang epekto ng pandemya. Ayon sa kanya, tiniyak nilang walang pamilyang magugutom, mayaman man o mahirap.

“Mayaman, mahirap, walang pinili ang inyong Yorme,” giit ni Domagoso. “’Yon ang kwento, lagyan natin ng kwenta—700,000 pamilya buwan-buwan ang tumanggap ng food box.”

Iginiit din ni Domagoso na ang istilo sa pagtugon sa pandemya ay nakaangkla sa obligasyon ng isang ama na ipaglaban ang kapakanan ng kanyang mga anak.

“Kapag walang makain ang anak ninyo, gagawan niyo ng paraan, di ba? ‘Yan din ang ginawa ko bilang ama ng dalawang milyong Manileño,” aniya.

Aminado ang dating alkalde na nangailangan siyang makiusap sa Sangguniang Panlungsod upang umutang para matustusan ang mga programa kontra COVID-19.

“Bakit ko ginawan ng paraan? Sinabi ko sa inyo, hindi ako nag-complain,” ani Domagoso.

“Napapanood niyo ako lagi sa Facebook, every Friday nagre-report ako. Kailan ako nagsinungaling sa taumbayan noong panahon ng pandemya?” giit ng alkalde sa kanyang regular Facebook Live updates sa pamamagitan ng Manila PIO.

“Pumanatag kayo, mga Batang Maynila,” ani Yorme. “’Wag kayong mag-alala. Kapag wala na akong maibenta, ‘tong relo na ito, ipatatasa ko kay Tambunting,” biro ng dating alkalde.

Muling tumatakbo si Domagoso para sa pagka-alkalde ng Maynila, dala ang pangakong ibalik ang kalinisan, disiplina, at kaayusan sa lungsod.

Ang kanyang slate na Yorme’s Choice ay itinatag upang ipagpatuloy ang mga reporma, programa at serbisyo na kanyang nasimulan.

Samantala, nagsagawa naman ng motorcade nitong araw ng Sabado sina Yorme Isko at ka tandem nito na si Chi Atienza sa District 2 (Tondo) at District 4 (Sampaloc) sa Maynila bilang bahagi ng kanilang city-wide campaign. JR Reyes