MANILA, Philippines – Iginiit ni Senador Rodante Marcoleta nitong Lunes na “hindi siya natatakot” kay Leyte Rep. Martin Romualdez, kasabay ng pagtatanggol sa testimonya ni Master Sgt. Orly Guteza na nag-ugnay kina Romualdez at Rep. Zaldy Co sa umano’y anomalya sa flood control projects.
Sa kanyang talumpati, itinanggi ni Marcoleta na kinunsinte niya ang testigo, at iginiit na pinaalalahanan lamang niya ito na balikan ang mga bahagi ng salaysay na nalaktawan.
Binigyang-diin din niyang hindi dapat kwestiyunin ang notarized statement dahil personal na tumestigo si Guteza sa Senado.
“Sino ba ang natatakot kay Martin Romualdez? Marami po siguro dito sa kapulungang ito. Pero hindi ako natatakot kay Martin Romualdez,” aniya.
Binatikos din niya ang paggamit ng inter-parliamentary courtesy para hadlangan ang pagdinig kina Romualdez at Co, at iginiit na nararapat lamang na malaman ng publiko ang katotohanan sa isyung nakasalalay ang kinabukasan ng bansa. RNT
