IBINIDA ng Civil Service Commission (CSC) na napanatili nito ang kanilang posisyon bilang isa sa mga nangungunang ahensya ng gobyerno na may high approval at trust ratings, na naglalagay ng ika-9 sa parehong kategorya batay sa isinagawang national survey kamakailan.
Pinasalamatan ni CSC Chairperson Karlo Nograles ang publiko gayundin ang nasa 1.9 milyon civil servants sa bansa sa kanilang patuloy na suporta.
“On behalf of the 1,300-strong employees of the CSC nationwide, I would like to express our gratitude for the trust and approval that the public has given us. Ang inyong tiwala ay magsisilbing inspirasyon upang aming patuloy na maihatid nang maayos ang mga napapanahong serbisyo at programa para sa mga kapwa lingkod bayan ng bansa,” ani Nograles.
Sinabi pa ni Chairperson Nograles na noong 2023, inilunsad ng CSC ang mga programa, sistema, at proseso ng human resource (HR) at organization development (OD), na lahat ay nakatuon sa pagtiyak ng maayos at mahusay na paggana ng burukrasya sa panahon ng post-pandemic.
Isa sa mga pangunahing patakarang ipinahayag ng CSC ay ang Implementing Rules and Regulation on the Grant of Night Shift Differential Pay (NSDP) sa Government Employees alinsunod sa Republic Act No. 11701.
Gumawa din ang CSC ng isang pangunahing patakaran noong 2023 upang kilalanin ang mga manggagawa sa gobyerno na nasa serbisyo nang hindi bababa sa 10 taon at nakakuha ng mga kaalaman at kasanayan ngunit hindi nagtataglay ng naaangkop na civil service eligibility.
Alinsunod sa mandato nito bilang central HR agency ng gobyerno ng Pilipinas, nalampasan ng CSC ang mga target noong nakaraang taon sa epektibong pagpapatupad ng flagship program nito.
Noong 2023, pinarangalan ng CSC ang Bangko Sentral ng Pilipinas ng Gold Award para sa pagkamit ng Maturity Level 4, o Strategic HR, sa apat na pangunahing bahagi ng pamamahala ng HR.
Ibinahagi rin ni Chairperson Nograles na mas pinaigting ng CSC ang digitization upang higit pang mapabuti ang paghahatid ng serbisyo publiko sa ganap na pagpapatupad ng Civil Service Eligibility Verification System (CSEVS) at ang paglulunsad ng CSC-Learning Management System (LMS).
Ang CSEVS ay isang elektronikong database na nagpapahintulot sa mga awtorisadong tauhan na suriin ang katotohanan ng pagiging karapat-dapat sa serbisyo sibil ng mga indibidwal, bilang bahagi ng proseso ng pagpapatunay ng mga appointment na isinumite ng mga ahensya.
Samantala, ang bagong inilunsad na CSC-LMS ay isang online learning and development platform na nagsisilbing one-stop-shop para sa mga pampublikong tagapaglingkod na naghahangad na pahusayin ang kanilang pamumuno at HR management skills.
“The CSC is pleased to present several notable accomplishments in 2023 that have garnered people’s trust and approval. We commit to remain steadfast in doing our work effectively and efficiently hanggang sa sama-sama nating makamit ang pangarap ng bawat Pilipino — ang Matatag, Maginhawa at Panatag na Buhay,” ani Chairperson Nograles.
Ang survey sa Approval and Trust Ratings ng Top Ten Government Agencies ay isinagawa ng Publicus Asia mula 14 hanggang 18 nitong Marso 2024 para sa “Pahayag 2024 First Quarter Survey,” na may 1,500 respondents sa buong bansa. RNT
