MANILA, Philippines – Nilinaw ng House Committee on Justice na isasagawa bilang preliminary investigation ang pagdinig sa Marso 25 kaugnay ng impeachment complaints laban kay Vice President Sara Duterte, kung saan limitado ang partisipasyon sa mga miyembro lamang ng komite.
Ayon kay Batangas Rep. Gerville Luistro, hindi ito ituturing na isang trial kaya tanging mga miyembro ng komite ang maaaring magsagawa ng pagtatanong sa mga testigo.
“In fact, even in the rules in impeachment which was adopted by the 20th Congress, very clear ang sinabi doon, only the justice members can conduct direct examination and cross examination so the only interpretation we get from that is no one can participate except the justice members,” aniya.
Dagdag niya, ang mga abogado, kabilang ang legal team ni Duterte, ay maaari lamang magbigay ng payo sa kanilang kliyente at hindi maaaring direktang makilahok sa deliberasyon o mag-cross-examine ng mga testigo.
“Again let us remember that this is just a stage of preliminary investigation… the lawyers will be sitting near their clients… and will just be giving constant advice,” paliwanag ni Luistro.
Saklaw din ng limitasyong ito ang mga mambabatas na hindi miyembro ng komite, na maaari lamang maghain ng manifestation ngunit hindi maaaring magtanong sa mga testigo.
Binigyang-diin ni Luistro na ang tungkulin ng komite ay kahalintulad ng mga prosecutor sa pagtukoy kung may probable cause.
“Ito pong ginagawa ng Justice Committee… is similar to a preliminary investigation of the prosecutors in an ordinary criminal case… kami po ‘yung nagsusuri ng ebidensya whether this evidence will amount to probable cause,” aniya.
Kung matukoy ang probable cause, irerekomenda ng komite ang kaso sa plenaryo. Kapag sinuportahan ito ng hindi bababa sa isang-katlo ng mga miyembro ng Kamara, ipapasa ang articles of impeachment sa Senado kung saan isasagawa ang paglilitis. RNT
