QUEZON CITY, Philippines — Sinimulan ng mga mag-aaral ng Pinyahan Elementary School ang International Lead Poisoning Prevention Week sa pamamagitan ng interactive na programang “Usapang Tingga para sa Malusog na Bata,” katuwang ang EcoWaste Coalition.
Nagbigay ang aktibidad ng mahahalagang impormasyon tungkol sa epekto ng pagkakalantad sa tingga (lead) sa kalusugan, lalo na sa paglaki at pag-unlad ng mga bata.
Itinampok din ang mga praktikal na paraan upang maiwasan ang pagkakalantad sa tingga, na maaaring makapinsala sa utak, magpababa ng IQ at tagal ng atensyon, makaapekto sa pag-aaral, at magdulot ng mga problema sa pag-uugali ng mga bata. DANNY QUERUBIN
