MANILA, Philippines – Tahasang inakusahan ni Davao City Rep. Paolo “Pulong” Duterte ang kampo ng isang mambabatas na nanggigipit at nananakot sa mga miyembro ng Kamara upang suportahan ang impeachment move laban sa kanyang kapatid na si Vice President Sara Duterte.
Sa isang Facebook post, ibinulgar ni Rep. Duterte na isang nagngangalang “Charise” ang kumokontak sa mga Chief of Staff ng mga mambabatas at nagsabing puputulin ang pondo ng kanilang distrito sa ilalim ng General Appropriations Act (GAA) kapag hindi sila sumama sa krusada laban sa Bise Presidente.
Ayon kay Rep Duterte, damay sa banta ang pondo para sa mga irrigation, paaralan, tulay, kalsada, at iba pang proyektong imprastraktura.
“What we are seeing now under this administration is not politics as usual, this is outright coercion.If it is true that congressmen are being threatened with such removal of funding for their districts, then it is clear, this is no longer democracy.”ani Rep Duterte.
Inilarawan ng mambabatas ang hakbang bilang “political blackmail” at binigyang-diin na ang pambansang budget ay para sa taumbayan at hindi dapat gamiting hostage para sa politikal na interes. Gail Mendoza
