MANILA, Philippines – Nabawasan ang nakolektang kita ng Bureau of Customs (BOC) noong Mayo matapos maapektuhan ng pansamantalang pagsuspinde ng excise tax sa ilang produktong petrolyo at pagbaba ng dami ng inaangkat na kalakal sa bansa.
Sa pinakahuling datos ng ahensiya, umabot lamang sa ₱80.66 bilyon ang nakolekta nitong kita noong Mayo, kulang ng ₱1.73 bilyon o 2.1 porsiyento kumpara sa itinakdang target para sa buwan. Ito ang unang pagkakataon ngayong taon na hindi naabot ng BOC ang buwanang revenue target nito.
Ayon sa BOC, pangunahing dahilan ng kakulangan ang pagbaba ng importasyon ng langis at iba pang produkto, gayundin ang pagpapatupad ng Executive Order No. 114 na pansamantalang nagsuspinde ng excise tax sa kerosene at liquefied petroleum gas (LPG). Ipinatupad ng administrasyong Marcos ang hakbang noong Abril bilang tugon sa krisis sa langis na dulot ng tensyon sa Gitnang Silangan.
Sa ilalim ng kautusan, nabawasan ng ₱37 ang presyo ng karaniwang tangke ng LPG at bumaba ng ₱5.65 kada litro ang halaga ng kerosene. Bagama’t nakaapekto ito sa koleksiyon ng gobyerno, nakatulong naman ito upang maibsan ang dagdag-pasanin ng mga mamimili sa gitna ng pagtaas ng presyo ng langis.
Sa kabila ng kakulangan noong Mayo, mas mataas pa rin ng 6.62 porsiyento ang koleksiyon ng BOC kumpara sa ₱75.7 bilyong naitala sa kaparehong buwan noong nakaraang taon. Mula Enero hanggang Mayo, nakalikom ang ahensiya ng kabuuang ₱406.4 bilyon, mas mataas ng 2.3 porsiyento sa target na ₱397.1 bilyon at 6.5 porsiyentong mas mataas kumpara sa parehong panahon noong 2025.
Samantala, ipinagpatuloy din ng BOC ang modernisasyon ng operasyon nito sa pamamagitan ng paglikha ng bagong Project Management Office at paglulunsad ng Automated Export Declarations System (AEDS) Plus upang mapahusay ang pamamahala sa mga proyekto at mapabilis ang proseso ng pag-export ng mga kalakal. JAY Reyes
