MANILA, Philippines – Nababahala ang Department of Interior and Local Government na ang Philippine Offshore Gaming Operators o POGOs ay lumipat na sa guerilla operations matapos i-anunsyo ang ban sa mga ito.
Ayon kay Interior Secretary Juanito Victor Remulla, halimbawa nito ay ang isang POGO na nakakuha ng permit to operate bilang isang restaurant at KTV sa Lapu-Lapu City, Cebu.
“I think the last case in Lapulapu showed it very clear that when the PAOCC [Presidential Anti-Organized Crime Commission] raided the premises, the restaurant and the hotel and the bar were a front and then it was a guerrilla operation,” sinabi ni Remulla sa confirmation hearing nito sa Commission on Appointments.
Aniya, kailangang mas maging maingat ng mga alkalde at mga lokal na opisyal sa pag-iisyu ng business at iba pang permit, maging ang inspeksyon sa mga establisyimentong ito.
Dagdag pa, pinag-aaralan din nila ang pagpaparusa sa mga local government units na mag-iisyu ng permit sa mga ito.
Ani Remulla, wala pa silang konkretong impormasyon kung ilan sa mga POGO ang naging “guerilla” na bagamat ipinaliwanag niya na iinspeksyunin nila ang daan-daang entities na inisyuhan ng lisensya ng Philippine Amusement and Gaming Corp (PAGCOR).
“We will inspect all the 100 plus from December 15 up to December 31 to make sure they are closed. And then we will determine kung ano yung nasa na yung mga illegal at saan sila pumunta,” ayon sa Kalihim. RNT/JGC
