MANILA, Philippines – Isang mister ang namatay makaraang malunod matapos na yayain nito ang misis upang magdiwang ng mother’s day sa ilog sa Brgy. Banay Banay, Amadeo, Cavite.
Isinugod pa sa Rural Health Center ng Amadeo ang biktima na si alyas Ranel subalit hindi na ito umabot ng buhay.
Binigyan umano ng treat ng biktima ang kanyang misis sa Mother’s day nang yayain nito na maligo sa Biting Bayong river sa Brgy. Banay Banay, Amadeo, Cavite.
Bandang alas-2:00 ng hapon, habang naliligo ang dalawa ay bigla umanong nagtungo ang biktima sa mataas na bahagi ng lugar at tumalon hanggang sa nakita na lamang itong tila nalulunod.
Sinaklolohan ang biktima at naisugod pa sa ospital subalit hindi na naisalba pa. Margie Bautista
