MANILA – Tiniyak ni House of Representatives Speaker Ferdinand Martin G. Romualdez nitong Sabado sa mga sundalo at lahat ng miyembro ng Armed Forces of the Philippines (AFP) na isusulong ng administrasyong Marcos ang mahigit 100 porsiyentong pagtaas sa kanilang pang-araw-araw na subsistence allowance sa 2025.
“Sa susunod na taon, asahan mong makatanggap ng mas mataas na daily subsistence allowance mula sa iyong gobyerno. Mula P150 per day, dodoblehin natin ang daily subsistence allowance ninyo. Ang target natin, maitaas natin ito hanggang PHP350 per day,” aniya sa mga sundalo sa Camp Nakar sa Lucena City.
Si Romualdez, kasama ang iba pang pinuno ng Kamara, ay sumama sa mga opisyal at tauhan ng Southern Luzon Command ng AFP, sa pangunguna ng kumander nito, si Lt. Gen. Facundo Palafox IV, para sa isang fellowship.
Binanggit niya na sa tagubilin ni Pangulong Ferdinand R. Marcos Jr., ang pagtaas, na mangangailangan ng PHP15 bilyon sa karagdagang pondo, ay isasama sa 2025 national budget.
Sinabi ni Romualdez na batid niya at ng kanyang mga kasamahan sa Kamara ang sakripisyo ng mga sundalo at kanilang mga pamilya para sa bansa, kaya nais nilang suklian ito “sa pamamagitan ng pagbibigay ng kaginhawaan sa inyong buhay.”
Naipasa na ng Kamara sa ikatlo at huling pagbasa ang panukalang nagpapatibay sa isang sustainable pension system para sa mga beterano at mga retiradong militar, habang isinusulong din ang mga hakbang upang magbigay ng de-kalidad na pangangalagang pangkalusugan at legal na tulong para sa mga tauhan ng militar sa legal na pagganap ng kanilang mga tungkulin. RNT
