MANILA, Philippines- Inihayag ng pamunuan ng Manila International Airport Authority (MIAA) na itinigil ang ginagawang pagsasaayos sa Ninoy Aquino International Airport (NAIA) Terminal 4, ngunit plano naman ng pribadong operator na magpatayo ng Terminal 5.
Ayon kay MIAA general manager Eric Ines, noong nakaraang Oktubre ay inihayag ng operator na New NAIA Infra Corp. (NNIC) na ang Terminal 4 ang pinakamatanda sa lahat ng NAIA terminals kaya’t isinailalim ito sa “safety upgrades” at pagsasaayos simula noong Nobyembre 6 at inaasahang magbubukas muli sa Pebrero ngayong taon.
Gayunman, sinabi ni Ines na sa ngayon, ang plano ay hindi buksan ang Terminal 4 ngunit hindi nagbigay ng karagdagang mga detalye.
Ang MIAA ay kasalukuyang nagsisilbing regulator para sa NAIA sa ilalim ng public-private partnership (PPP) na kasunduan sa NNIC.
Idinagdag ng grupo na ang mga update sa status ng renovation ay ipo-post sa mga social media platform ng NNIC.
Noong nakaraang Nobyembre, sinabi ng NNIC na nagsimula ang mga pagsasaayos sa Terminal 4 noong Nob. 6 gaya ng naka-iskedyul. Walang karagdagang detalye na ibinigay tungkol sa katayuan nito.
Ang terminal ay ginagamit upang magsilbi sa AirSWIFT na may 12 araw-araw na flight, Sunlight Air na may dalawang araw-araw na flight, at CebGo na may 36 araw-araw na flight
Gumagamit ang mga flight na ito ng mas maliliit na eroplano at mga service island na destinasyon.
Ang Manila Slot Coordination Committee — binubuo ng Undersecretary for Aviation and Airports; hepe ng MIAA, Civil Aeronautics Board (CAB), Civil Aviation Authority of the Philippines (CAAP), at NNIC general manager — planong unti-unting ilipat ang turboprop operations palabas ng NAIA.
Ayon kay Ines, ang plano ay maglipat ng paunang 30 porsyento ng mga operasyon ng turboprop simula Marso, at ang iba ay pinlano para sa iskedyul ng taglamig mula 2025 hanggang 2026.
Samantala, sinabi ni Ines na kailangan munang gibain ang Philippine Village Hotel bago simulan ang pagpapatayo ng Terminal 5, o extension ng Terminal 2. JR Reyes
