MAKATI City, Philippines – Inalis ni Interior and Local Government Secretary Jonvic Remulla nitong Martes ang mga opisyal ng Makati City Fire Station, na ang mga nakaparadang sasakyan ay humarang sa driveway ng fire truck, nang magsagawa siya ng sorpresang inspeksyon sa pasilidad.
Aniya ang pag harang sa driveway ng mga firetruck ay maaaring magdulot ng delay sa pag responde nito sa emergency. Gayundin ay paglabag ito sa Fire Code at iba pa nitong implementing rules.
Ang Republic Act 9514 o ang Fire Code of the Philippines of 2018 at ang 2019 Revised Implementing Rules and Regulations (IRR) ay nagsasaad na hindi maaaring magkaroon ng mga sagabal sa pagpasok at paglabas ng mga fire truck at emergency response vehicles at hindi rin dapat magkaroon ng anumang pag-iwas, panghihimasok o sagabal sa anumang operasyon ng serbisyo ng bumbero.
Ang mga opisyal na mapapatunayang lumalabag sa nasabing mga probisyon ay maaaring patawan ng pananagutang administratibo para sa sadyang hindi nararapat o matinding kapabayaan sa pagganap ng kanilang tungkulin sa ilalim ng Section 11 ng Fire Code.
Nanawagan din ang Department of the Interior and Local Government sa mga punong istasyon ng bumbero na ipagbawal ang anumang pagparada sa harap o malapit sa mga trak ng bumbero at iutos ang agarang pag-alis ng lahat ng hindi awtorisadong nakaparadang sasakyan na humaharang sa mga fire response units. RNT/MND
