MANILA, Philippines – Magdadala ng maulap na kalangitan, kalat-kalat na pag-ulan at thunderstorms ang low pressure area (LPA) sa ilang bahagi ng Southern Luzon, Visayas at Mindanao, ayon sa PAGASA nitong Huwebes, Setyembre 17.
Dakong alas-3 ng hapon, namataan ang LPA sa layong 160 kilometro silangan ng Puerto Princesa City, Palawan o 130 kilometro timog-kanluran ng Cuyo, Palawan.
Dahil sa LPA, makararanas ng maulap na panahon na may scattered rains at thunderstorms ang Visayas, MIMAROPA, Bicol Region, Zamboanga Peninsula, Bangsamoro Autonomous Region in Muslim Mindanao, Northern Mindanao, Batangas at Quezon.
Nagbabala ang PAGASA sa posibleng flash floods o landslides bunsod ng katamtaman hanggang sa kung minsan ay malakas na pag-ulan.
Samantala, Metro Manila at nalalabing bahagi ng bansa ay maaaring makaranas ng isolated rain showers o thunderstorms dahil sa localized thunderstorms.
Binabantayan din ng PAGASA ang Severe Tropical Storm Dujuan na nasa labas ng Philippine Area of Responsibility (PAR).
Dakong alas-3 ng hapon, nasa 2,910 kilometro silangan ng Extreme Northern Luzon ang Dujuan, taglay ang maximum sustained winds na 95 kilometro kada oras at pagbugsong hanggang 115 kph.
