ATIMONAN, Quezon – Pisak ang isang 37-anyos na maybahay matapos na mahulugan ng gumugulong na bato sa quarry site sa Sitio Pansol, Barangay Sokol dito noong Abril 16.
Kinilala ng pulisya ang biktima na si Mary, 37, residente ng Sitio Pansol.
Ayon sa imbestigasyon, si Norberto, ang live-in partner ng biktima, ay nagpapatakbo ng backhoe sa tuktok ng isang bundok at tinawagan ang kanyang helper na si Yael Villaruel, upang linisin ang lugar.
Nakita ni Villaruel si Mary na nagpapahinga sa duyan at hiniling na umalis ngunit hindi niya ito pinansin.
Biglang gumulong ang isang malaking bato mula sa taas na halos 30 metro at dinurog siya.
Nagtamo ng matinding pinsala si Mary at dinala sa ospital sa Lucena City ngunit namatay noong Abril 17.
Si Norberto, kasama si Villaruel, ay nagsumbong sa pulisya dito noong Linggo, Abril 21.
Ang lugar ay isang quarry site para sa mga materyales sa paggawa ng kalsada.
Napag-alaman din ng pulisya na walang safety officer at safety equipment na ibinigay ng contractor ng quarry. RNT
