MANILA, Philippines – Nagbitiw sa pwesto si National Police Commission (NAPOLCOM) commissioner Edilberto Leonardo matapos itong ma-cite in contempt kamakailan ng House Quad Committee dahil sa umano’y pagsisinungaling.
“I was able to read a letter that his resignation had been accepted. I will be getting the official notice maybe by Monday,” sinabi ni NAPOLCOM vice chairperson Alberto Bernardo nitong Biyernes, Oktubre 11, sa pagpapatuloy ng pagdinig ng QuadComm.
Nang tanungin kung mahaharap ito sa kasong administratibo, sinabi ni Bernardo na maghihintay sila sa mga mangyayari pa matapos ang resignation ni Leonardo.
“I convened the remaining commissioners and I was asking if we would be reporting to the Office of the President, through the SILG (Secretary of Interior and Local Government), that we are supposed to conduct of administrative investigation,” ani Bernardo.
“I was asking my colleagues, I was outvoted that they suggested to wait for developments. But personally I would like to file administrative case.”
Kamakailan ay ipinag-utos na i-detain sa Batasang Pambansa Complex sa Quezon City si Leonardo matapos niyang itanggi na nagkaroon ng meeting bago ang pagpatay sa tatlong Chinese drug convicts sa Davao Prison and Penal Farm noong Agosto 2016.
Ang pagpupulong na ito ay nangyari umano sa Davao City Criminal Investigation and Detection Group office at dinaluhan ni dating Davao Prison and Penal Farm chief Gerardo Padilla at retired police colonel Royina Garma.
Sa kabila nito, nanindigan si Leonardo na walang meeting na nangyari. RNT/JGC
