Hindi nakikita ni Agriculture Secretary Francisco Tiu Laurel, Jr ang kakapusan ng suplay ng baboy sa mga susunod na buwan sa kabila ng pagkalat ng African swine fever sa ilang bahagi ng bansa.
, sinabi ni Laurel na ang mga lockdown na nauugnay sa ASF ay nakabatay sa bukid.
“Wala naman akong nakikitang perceived shortage. Kasi ang mangyayari ngayon, yung mga let’s say katulad sa mga munisipyong merong ASF, hindi naman total na ila-lockdown at walang lalabas,” ani Laurel sa reporters sa sideline ng pagdinig ng House Committee on Appropriations sa P200.2-bilyong proposed budget ng Department of Agriculture para sa 2025.
Sinabi ni Laurel na hindi ipatutupad ng DA ang mahigpit na lockdown na ipinataw nang kumalat ang ASF sa ilang probinsya noong 2019.
“Puwede naman ‘yan lutuin. Ibang bansa nga, meron silang processing plants for infected animals para lutuin at ilata kasi safe naman,” aniya pa.
Ang mga apektadong hog raiser ay makakatanggap ng bayad-pinsala mula sa DA.
Babayaran ng P4,000 bawat isa ang mga culled na baboy at biik, P8,000 ang katamtamang laki ng baboy, at P12,000 ang malalaking baboy. Malaking pagtaas ito mula sa P5,000 na ibinigay noon.
“’Yun nga ang reason kung bakit tinaas namin at ni-nationalize namin ang indemnification, para talagang katayin na nila, i-surrender nila,” paliwanag ni Laurel.
Sinabi ni Laurel na hindi maaapektuhan ang supply ng baboy dahil nagpapatupad din ang DA ng hog repopulation program. Patuloy din ang importasyon.
Hindi rin aniya dapat maapektuhan ng ASF ang presyo ng baboy.
Sinabi rin ni Laurel na dapat walang epekto sa industriya ng processed meat.
Tinanong din si Laurel ukol sa pagsasailalim ng Pilipinas sa national state of calamity dahil sa ASF.
“No, no need. Ito ay naisalokal. Medyo kumakalat pero hindi kasing bilis.”
“And mas aware na kasi ang mga tao ngayon kasi nangyari na dati. Marami rin naman mga facilities may biosecurity. So hindi naman ibig sabihin ang buong munisipyo affected na. It’s still farm-based pa rin,” dagdag pa ng kalihim.
Inihayag din ni Laurel na 10,000 doses ng ASF vaccine ang nakatakdang dumating sa bansa sa susunod na linggo. Ang mga ito ay ipapamahagi sa mga hog raisers nang libre. RNT
