MANILA, Philippines — Nagpadala ng search, rescue and retrieval (SRR) team ang Philippine Navy sa Barangay Binaliw, Cebu City upang tumulong sa rescue operations matapos ang landslide sa landfill na naganap noong Enero 8.
Ayon sa Navy, agad na idineploy ng Naval Forces Central (NFC) ang kanilang specially trained rescue personnel na may dalang technical rescue equipment at protective gear para tumulong sa patuloy na operasyon sa mapanganib at hindi matatag na lugar.
Pagdating sa apektadong lugar nitong Enero 11, nakipag-ugnayan ang NFC rescue team sa Cebu City DRRMO, Bureau of Fire Protection, Cebu City Police Office at iba pang ahensya upang masiguro ang maayos at koordinadong rescue mission.
Patuloy namang mino-monitor ang kalagayan ng lupa upang maiwasan ang posibleng secondary incidents habang isinasagawa ang retrieval operations.
Sa huling ulat, anim ang nasawi, 12 ang nasugatan at 31 ang nawawala dahil sa landslide. RNT/JGC
