MANILA, Philippines- Sinabi ng National Bureau of Investigation (NBI)na natuklasan nila ang halos 200 pekeng birth certificate na inisyu ng civil registry sa karamihan sa Chinese nationals sa Sta. Cruz, Davao del Sur.
Sinabi ni NBI Region 11 Director Archie Albao na ang mga pekeng dokumento ay inilabas mula 2018-2019.
Ayon kay Albao, nagpapatuloy ang kanilang pagsisikap na imbestigahan ang mga kwestiyunableng birth certificates na inisyu sa foreign nationals partikular sa mga Chinese.
Nadiskubre ng NBI ang nasabing mga pekeng dokumento sa pamamagitan ng kanilang imbestigasyon gayundin ang pinagsama-samang pagsisikap kasama ang iba pang ahensya ng gobyerno tulad ng Philippine Statistics Authority, Bureau of Immigration at local government units.
Iginiit din nitong may kaugnayan ito sa pagkakaaresto sa isang Chinese national sa tanggapan ng Department of Foreign Afffairs sa Davao City noong Hulyo 9.
Sinabi ng NBI na ayon sa kanilang operatiba, ang naturang Chinese national ay inaresto dahil sa paglabag sa Passport Law, Falsification of Public Document , at Concealing True Name.
Ayon pa sa NBI, nakatanggap sila ng tawag mula sa DFA tungkol sa umano’y peke o counterfeit na mga dokumento tulad ng birth certificate, identification card at driver’s license.
Dinala na sa NBI Southeastern Mindanao Regional Office ang Chinese national kung saan siya sumailalim sa booking procedures. Jocelyn Tabangcura-Domenden
