MANILA, Philippines- Magsasagawa ng regional consultations ang National Economic and Development Authority (NEDA) upang punan ang mga kakulangan sa planong Trabaho Para sa Bayan, sinabi ng Department of Labor and Employment (DOLE).
Ang Trabaho Para sa Bayan plan ay 10 taong employment roadmap na makatutulong sa paglikha ng hindi bababa sa tatlong milyong trabaho sa 2028.
Noong 2023, nilagdaan ni Pangulong Ferdinand “Bongbong” Marcos Jr. ang Trabaho Para sa Bayan Act, na naglalayong magbigay ng suporta sa micro, small, and medium enterprises at industry stakeholders.
Sinabi ni Laguesma na ang mga industriya sa serbisyong may kinalaman sa kalusugan, turismo, konstruksyon, Information Technology-Business Process Outsourcing, enerhiya, agrikultura, edukasyon, at mga malikhaing industriya ay maaaring makalikha ng mga trabaho para sa mga Pilipino.
Ayon kay Laguesma, malaking bahagi ng pangangailangan ng de-kalidad na trabaho ay nasa manufacturing gayundin ang transportation at logistics.
Ang NEDA director general ang mamumuno sa Trabaho Para sa Bayan-Inter-Agency Council.
Magiging miyembro naman ng Inter-agency council ang mga kalihim ng DOLE, Department of Trade and Industry, Department of the Interior and Local Government, Department of Budget and Management, Department of Finance, at ang director general ng Technical Education And Skills Development Authority.
Sinabi ni Laguesma na ang mga kinatawan ng labor organizations, employer organizations, informal sector, marginalized at vulnerable sectors ay bahagi rin ng konseho. Jocelyn Tabangcura-Domenden
