MANILA, Philippines – PINANGUNAHAN ni Pangulong Ferdinand R. Marcos Jr. ang panunumpa ngayong araw ng Lunes, Hunyo 30, ni Ariel F. Nepomuceno bilang bagong Commissioner ng Bureau of Customs, government agency na inatasan na paigtingin ang pagsisikap na labanan ang smuggling at illicit trade.
Bago ang kanyang pagkakatalaga, nagsilbi si Nepomuceno bilang Executive Director ng National Disaster Risk Reduction and Management Council at Undersecretary ng Office of Civil Defense.
Pinalitan ni Nepomuceno si BOC head Bienvenido Rubio.
Si Rubio ay isa sa mga miyembro ng gabinete ni Pangulong Marcos na naghain ng courtesy resignation.
Sinabi ni Rubio na ginawa niya ito upang malayang masuri ng Pangulo ang pagganap ng mga pinuno ng mga ahensya at upang mas mapabuti ang serbisyo para sa mamamayang filipino.
Samantala, ang marching order ni Pangulong Marcos para sa BOC ay bantayan ang ‘borders’ ng bansa at tiyakin ang ‘transparency at efficiency’ sa revenue collection.
“Nepomuceno is not new to the BOC, as he had previously held positions within the agency, including assistant commissioner of the Post Clearance Audit Group from December 2017 to April 2018 and deputy commissioner of the Enforcement Group from December 2013 to February 2017,” ayon sa ulat.
Nagsilbi rin siya bilang director at CEO ng Office of Civil Defense sa ilalim ng Department of National Defense mula December 2012 hanggang March 2013, at bilang isang consultant ng Office of the President noong 2003.
Taong 2000, hinawakan niya ang executive positions sa Food Terminal Inc. at Avalon Pacific Corporation, kung saan siya nagsimula ng kanyang karera bilang vice president for operations noong 1997.
Ang pinakahuli, simula 2019, nagsilbi si Nepomuceno bilang chairman at CEO ng Malayan Pacific Power Holdings Corporation. Kris Jose
