MANILA, Philippines – BILANG pagtugon sa direktiba ni Pangulong Ferdinand Marcos Jr., ipinag-utos ng Department of Energy (DOE) sa National Grid Corporation of the Philippines (NGCP) na agad na ibalik ang apektadong transmission lines na naging dahilan ng power disruptions o kawalan ng suplay ng kuryente sa iba’t ibang bahagi ng bansa sa nakalipas na mga araw.
Sinabi ni Presidential Communications Office Undersecretary at Palace Press Officer Claire Castro na ayon sa DOE, kaagad na kumilos ang ahensiya sa ilalim ng utos ng Pangulo na “stabilize grid conditions and protect consumers from power disruptions.”
“The DOE swiftly ordered NGCP’s restoration of affected transmission lines which are Tayabas-Ilijan 500kV and Dasmariñas-Ilijan 500kV line,” ang pahayag ni Castro.
Idinagdag pa ni Castro na ang NGCP ay inatasan na “provide the full technical and incident reporting to ensure accountability and the safe return of critical capacities to the grid.”
Ani Castro, ang DOE ay “actively worked with generating companies to safely synchronize affected supply capacities back on the grid.”
Pinakilos naman ng energy department ang grid reliability task force kasama ang Energy Regulatory Commission (ERC), Independent Electricity Market Operator of the Philippines (IEMOP), National Transmission Corporation (TransCo), at Power Sector Assets and Liabilities Management Corporation (PSALM). KRIS JOSE
