MANILA, Philippines – Patuloy na lumalakas ang bagyong Marce habang kumikilos ito pahilagang-kanluran sa ibabaw ng Philippine Sea, sinabi ng PAGASA nitong Miyerkules.
Sa 5 a.m. bulletin nito, itinaas ang Signal No. 2 sa silangang bahagi ng Babuyan islands (Camiguin Is., Babuyan Is.,) at ang hilagang-silangan na bahagi ng mainland Cagayan (Santa Ana, Gonzaga, Lal-Lo, Santa Teresita, Buguey).
Ang Signal No. 1 ay itinaas sa mga sumusunod na lugar:
-Batanes
-ang natitirang bahagi ng Cagayan kasama ang Babuyan Islands
-Ilocos Norte
-Ilocos Sur
-Apayao
-Abra
-Kalinga
-Mountain Province
-Ifugao
-ang hilagang bahagi ng Benguet (Mankayan, Buguias, Kabayan, Bakun, Kibungan, Atok, Bokod)
-Isabela
-Nueva Vizcaya
-Quirino
-ang hilagang bahagi ng Aurora (Dilasag, Casiguran, Dinalungan, Dipaculao, Baler, Maria Aurora)
Ang sentro ng Marce ay nasa 345 kilometro silangan ng Tuguegarao City, Cagayan.
Kumikilos ito Hilagang-kanluran sa bilis na 15 km/h na may lakas na hanging aabot sa 140 km/h malapit sa gitna at pagbugsong aabot sa 170 km/h.
Ayon sa forecast track ng PAGASA, inaasahang patuloy na tumitindi si Marce at maaaring umabot sa peak intensity nitong Miyerkules bago ito maglandfall o dumaan malapit sa Babuyan Island o hilagang bahagi ng mainland Cagayan mula Huwebes ng hapon hanggang Biyernes ng madaling araw.
Maaaring lumabas ito sa Philippine Area of Responsibility region sa Biyernes ng gabi.
“Ang pinakamataas na Wind Signal na maaaring itaas sa panahon ng pagkakaroon ng Marce ay Wind Signal No. 4,” sabi ng PAGASA. RNT
