MANILA, Philippines- Nagbabala ang National Security Council (NSC) na may foreign entities na maaaring magtangka na makialam at manggulo sa 2025 national at local elections.
Sa isang panayam, sinabi ni NSC Assistant Director General Jonathan Malaya na patuloy na tumataas ang “foreign maligned interference operations” sa bansa.
Kabilang na sa mga aktibidad ng mga ito ay ang pag-hack sa websites at social media accounts ng marami na ring bilang ng ahensya ng gobyerno.
Ang pahayag na ito ni Malaya ay matapos na magbabala ang Malakanyang hinggil sa kumakalat na video na nagtatampok sa ‘digitally manipulated audio clip’ ni Pangulong Ferdinand Marcos Jr., na nag-uutos sa militar na kumilos laban sa isang bansa.
Mariin namang itinanggi ng Presidential Communications Office (PCO) ang naturang video, kagyat na nilinaw na si Pangulong Marcos “has no such directive” at ang audio ay “deepfake” at nilikha gamit ang artificial intelligence (AI).
Samantala, nakikipag-ugnayan na ang Department of Information and Communications Technology (DICT) sa Philippine National Police (PNP) at National Bureau of Investigation (NBI) para tugisin ang mga indibidwal na nasa likod ng “deepfake” video ni Pangulong Marcos.
Ang babala rin ni Malaya ay maaaring gamitin ang video upang guluhin ang mga isyu sa West Philippine Sea, tulad ng sinasabing “gentleman’s agreement” sa Ayungin Shoal.
Maalalang pinuna ng PCO ang isang manipuladong video na kumakalat online na nagtatampok ng pekeng audio na ginagaya si Pangulong Marcos at nag-uutos sa militar na kumilos laban sa isang bansa.
Ayon kay DICT Undersecretary Jeffrey Ian Dy, ito ang unang pagkakataon na ginamit ang boses ng Pangulo para gumawa ng isang policy statement. Kris Jose
