Pinagtibay ni EJ Obiena ang kanyang paghahanda para sa 2024 Paris Olympics matapos maipako ang gintong medalya sa USATF Los Angeles Grand Prix kahapon sa Drake Stadium sa Los Angeles.
Naghari ang 28-taong-gulang na pole vault ace pagkatapos na lumampas sa 5.80 metrong marka upang kumpletuhin ang isa pang tagumpay na may ilang buwan na lang mula sa kanyang ikalawang sunod na paglahok sa Summer Games.
Naungusan ni Obiena si Simen Guttormsen ng Norway, na nagrehistro ng 5.70m, habang ang hometown bets na sina KC Lightfoot at Christopher Nilsen, na parehong pamilyar na kalaban ng Pinoy bet, ay nagtapos sa ikatlo at ikaapat na may magkaparehong 5.70m na pagtatapos.
Ito ang pinakahuling golden run para kay Obiena ngayong taon matapos ding maghari sa Memorial Josip Gasparac sa Croatia at ISTAF Indoor Tournament sa Berlin pareho noong Pebrero.
Samantala, ang Filipina-American Olympic hopeful na si Lauren Hoffman ay nagtapos sa ikalima sa women’s 400m hurdles sa parehong torneo matapos tapusin ang karera sa loob ng 55.84 segundo.
Nanguna si Anna Cockrell ng USA sa event na may 53.75 output habang si Andrenette Knight ng Jamaica at isa pang Amerikano sa Cassandra Tate ay pumangalawa at pangatlo matapos ang orasan sa 54.69 at 55.02 segundo.JC
