MANILA, Philippines – Plano ng Department of Migrant Workers (DMW) ang major expansion o pagpapalawak ng OFW Hospital (OFWH) ngayong taon bilang tugon sa malaking pangangailangan para sa serbisyo.
Kabilang sa naturang plano ang pagkuha ng Level 2 license mula sa Department of Health (DOH), na magbibigay-daan sa ospital na magbukas ng mga Intensive Care Unit (ICU), palawakin ang mga serbisyo ng outpatient, at mag-alok ng higit pang mga specialty clinic.
Binigyang-diin ng DMW ang kahalagahan ng pagpapalawak ng bilang ng mga overseas Filipino workers at kanilang pamilya na makakakuha ng medical services sa hospital na matatagpuan sa San Fernando, Pampanga.
Base sa First Quarter 2025 Performance Report ng DMW, sinabi ng ahensya na nagpapahiwatig ito ng lumalagong tiwala sa mga specialized healthcare initiatives ng gobyerno para sa mga migranteng manggagawa at kanilang mga pamilya.
Bukod dito, sinabi nito na ang mga bilang na ito ay patunay ng lumalaking papel ng ospital bilang isang mahalagang sistema ng suporta para sa mga OFW na umuuwi, alinsunod sa direktiba ni Pangulong Ferdinand R. Marcos Jr. na pahusayin ang mga serbisyong pangkapakanan para sa mga migranteng manggagawa.
Sa buod ng outpatient department at hospital admissions, iniulat din ang paglaki ng mga departamento tulad ng radiology at laboratory procedures, na tumaas ng 30 porsyento, heart station ng 34 porsyento, at respiratory procedures ng 10 porsyento.
Ang iba pang mga serbisyo, tulad ng 24/7 emergency care, telemedicine, surgery, obstetrics at gynecology, at mga diagnostic unit, ay nakakita rin ng pagtaas sa dami ng pasyente.
Target din ng OFWH ang pagkilala bilang Pre-Employment Medical Examination (PEME) provider para sa mga overseas workers at isang lisensiyadong Cancer Treatment Facility.
Kumikilos din ang ospital patungo sa full digitalization ng mga sistema nito. Ang pagtatayo ng isang nakalaang gusali para sa Cancer Center ay nakatakdang magsimula, kasabay ng mga pagpapalawak sa Heart Station, Respiratory, at Radiology units. (Jocelyn Tabangcura-Domenden)
