MANILA, Philippines- Muli na namang magpapatupad ng dagdag-presyo sa kada litro ng mga produktong petrolyo ang mga kompanya ng langis sa bansa epektibo bukas.
Sa abiso ng mga kompanya ng langis sa bansa na pinangunahan ng Pilipinas Shell, Petron Corporation, Seaoil, PTT Philippines, Total Philippines, Unioil, Petro Gazz at Phoenix Petroleum, magpapatupad sila ng dagdag presyo na P0.20 sa kada litro ng kanilang gasolina, P0.40 sa kada litro ng diesel at P0.20 sa kada litro ng kanilang kerosene epektibo alas-6 bukas ng umaga.
May dagdag-presyo rin sa mga nasabing produktong petrolyo sa kahalintulad na halaga ang kompanyang Caltex (CPI) na magiging epektibo alas-12:01 bukas ng hatinggabi habang ang CleanFuel naman ay magiging epektibo alas-4:01 bukas ng hapon.
Ito na ang ika-siyam na sunod na linggong pagtaas sa presyo ng gasolina habang nasa ika-sampung magkakasunod na linggo naman para sa produktong diesel at kerosene.
Ang ipapatupad na dagdag-presyo sa mga produktong petrolyo ay bunsod sa patuloy na paggalaw ng presyuhan nito sa pandaigdigang merkado.
Matatandaan na nito lamang nakaraang Martes ay nagpatupad ng oil price hike ang mga kompanya ng langis sa bansa na P0.50 sa kada litro ng kanilang gasolina, P1.20 sa kada litro ng diesel at P1.10 sa kada litro ng kanilang kerosene. JAY Reyes
