GUIMARAS, Philippines – May naitalang oil spill sa baybayin ng Barangay Hoskyn sa Jordan, Guimaras nitong Sabado ng umaga, Abril 25, dahilan para magbabala ang mga opisyal sa mga residente at mangingisda na lumayo sa apektadong lugar.
Ayon sa ulat, natuklasan ang oil spill bandang 7:05 a.m. malapit sa barangay hall at covered court, at nakaapekto sa bahagi ng Sitio Sambag at Sitio Baluarte.
Nakita ang parang langis na kumakalat sa dalampasigan, na ikinabahala dahil sa posibleng epekto nito sa yamang-dagat, kabuhayan sa pangingisda, at kalusugan ng mga tao.
Ang Barangay Hoskyn ay isang coastal na komunidad na nakasalalay sa pangingisda, kaya malaki ang epekto sa kabuhayan ng mga residente.
Nakikipag-ugnayan na ang mga lokal na opisyal sa iba’t ibang ahensya ng pamahalaan para sa pagtugon at monitoring, ngunit hindi pa matukoy ang pinagmulan ng spill.
Pinapayuhan ang publiko na iwasan muna ang lugar at agad mag-report kung may makitang kaugnay na insidente. RNT/MND
