2 minor eruption, pagtaas ng lindol naitala sa Taal Volcano

BATANGAS, Philippines – Nagpakita ng panibagong aktibidad ang Taal Volcano matapos maitala ang dalawang minor phreatic eruptions at pagdami ng seismic activity sa loob ng nakaraang 24 oras, ayon sa Philippine Institute of Volcanology and Seismology (Phivolcs) nitong Linggo, Abril 26.

Sa umagang bulletin ng Phivolcs, naitala ang dalawang steam-driven eruptions o “pusngat” na tumagal ng 10 minuto (1:57 a.m. hanggang 2:07 a.m.). Umabot sa 150 hanggang 200 metro ang itinaas na usok mula sa bunganga ng bulkan.

Ayon sa ahensya, ito na ang ikalimang minor eruption ng Taal ngayong buwan. Matatagpuan ang bulkan sa gitna ng Taal Lake sa Batangas.

Nauna nang naitala ang mga sumusunod na aktibidad:

• Abril 21: 1-minutong weak phreatic eruption

• Abril 9: 2-minutong phreatomagmatic eruption

• Abril 10: 1-minutong eruption

• Abril 6: 2-minutong phreatic burst

Ayon sa Phivolcs, ang phreatomagmatic eruption ay nangyayari kapag naghalo ang tubig at magma, habang ang phreatic eruption ay steam explosion dahil sa init mula sa magma o mainit na bato.

Kasabay nito, tumaas din ang seismic activity sa bulkan na may 25 volcanic earthquakes at 23 volcanic tremors na tumagal ng 1 hanggang 29 minuto—ang pinakamataas ngayong buwan. Mas tahimik ito noong nakaraang dalawang araw.

Naitala rin ang 709 metric tons ng sulfur dioxide (SO₂) emissions, na tinawag na “voluminous” ng Phivolcs.

Walang naobserbahang volcanic smog (vog) o pag-akyat ng mainit na likido sa crater lake.

Nananatili sa Alert Level 1 ang Taal Volcano, pero nagbabala ang Phivolcs na posible pa rin ang biglaang steam-driven o phreatic explosions.

Pinapaalalahanan din ang publiko na bawal pa rin ang pagpasok sa Volcano Island, pamamangka sa Taal Lake, at paglipad ng aircraft malapit sa bulkan. RNT/MND