MANILA, Philippines – Nanindigan ang Office of the Ombudsman na may patunay silang nagtuturo na pagmamay-ari ni dating Ako Bicol party-list Rep. Zaldy Co ang Sunwest Construction, ang recipient ng bilyong pisong halaga ng maanomalyang flood control projects.
Ito ang naging pahayag ni Assistant Ombudsman Mico Clavano isang araw matapos magsampa ng malversation at two counts ng graft charges laban kay Co at iba pang opisyal ng Department of Public Works and Highways (DPWH) sa Mimaropa region; at mga direktor ng Sunwest Corporation ang Ombudsman kaugnay sa P289 milyong flood control project sa Oriental Mindoro.
Ang P289 milyong road dike project ay itinayo ng Sunwest Construction, isang kompanyang itinayo ni Co at pagmamay-ari pa rin ng kanyang mga kapamilya.
Nauna nang itinanggi ni Co na kabilang siya sa Sunwest at sinabing nag-divest na siya sa kompanya bago ang halalan sa Kamara noong 2019.
“As for DPWH officials and employees, the evidence is already there because their actions are documented, they are the ones who issued a certification [on the project], and we used these documents to establish the process of approving a substandard project,” ani Clavano.
“When it comes to Sunwest, there is documentary evidence because these respondents are in the GIS (General Information Sheet),” sinabi pa ng opisyal.
Mapatutunayan umano ng Ombudsman na may kaugnayan sa pagitan ng Sunwest at ni Co.
“When it comes to Zaldy Co, we also have proof that na siya talaga ang beneficial owner [of Sunwest Construction]. Kumbaga, kahit wala po siya sa corporate papers, dinidirect niya ang operation at nakikinabang din po siya sa earnings ng corporation na ‘yun,” dagdag pa ni Clavano.
Ayon sa Sumbong sa Pangulo data, nanalo ang Sunwest ng P10.1 bilyon sa 78 flood control projects na karamihan ay nasa Bicol region. RNT/JGC
