MANILA, Philippines – Nagpahayag ng pag-iingat ang mga opposition lawmaker sa Kamara kaugnay ng panukala ni Senate President Vicente Sotto III na amyendahan ang 1987 Constitution matapos ibasura ng Supreme Court (SC) nang pinal ang impeachment laban kay Vice President Sara Duterte.
Ito ay kasunod ng pagbatikos ni Sotto sa desisyon ng SC na pagtibayin ang Hulyo 2025 ruling na nagdeklara sa impeachment bilang unconstitutional dahil sa paglabag sa one-year bar rule.
Ayon kay Sotto, ang mga opsyon na lamang ay maghintay na magretiro ang kasalukuyang mga mahistrado o ituloy ang Charter change (Cha-cha).
Sinabi ni Mamamayang Liberal Rep. Leila de Lima na siya ay “open-minded” sa Cha-cha depende sa saklaw nito.
Ayon sa kanya, bukas siya “if the goal is to clarify the provisions on impeachment and make self-executing the provision barring political dynasties, and amending economic provisions.”
Ngunit mariin niyang tututulan ito kung ang layunin ay, “to pave the way for term extensions and remove term limits, remove the provision banning political dynasties, and dilute provisions on human rights and social justice.”
Mas tahasan namang tumutol si Caloocan Rep. Edgar Erice, kapwa miyembro ng Liberal Party, na nagsabing ang Kongreso ay “with all its anomalies, has no moral authority to revise the Constitution as it smacks with a lot of vested interests.”
Aniya, “ridiculous and suspicious” ang Cha-cha lalo na’t dalawang taon na lamang bago ang 2028 elections.
Dagdag pa ni Erice, wala na ring sapat na panahon para sa isang constitutional convention, at kuwestiyonable rin ang moral authority ng Kongreso dahil sa mga alegasyon ng anomalya at korupsiyon.
“Tito Sotto’s rant against the Supreme Court is much ado about nothing,” sabi niya.
Samantala, sinabi ni De Lima na interesado siyang talakayin ng Senado at Kamara kung paano maaamyendahan ang kanilang impeachment rules batay sa bagong desisyon ng SC.
“I believe there was really judicial overreach here, where the court really weakened or intruded into the powers of other branches of government,” ani De Lima.
“This judicial legislation sets a very dangerous precedent that weakens separation of powers by transforming impeachment from a political safeguard into a judicially managed process, contrary to the design and spirit of the Constitution,” dagdag pa niya. RNT/MND
