MANILA, Philippines – Naniniwala si Paolo Ortega V, House Deputy Speaker at kinatawan ng La Union 1st District, na maaaring magbigay ng mahalagang impormasyon ang isang dating opisyal ng Office of the Ombudsman sa nagpapatuloy na impeachment proceedings ng House Committee on Justice laban kay Sara Duterte.
Dahil dito, hinimok ni Ortega noong Linggo, Marso 8, ang justice panel na imbitahan si Melchor Arthur Carandang, dating overall Deputy Ombudsman, bilang resource person sa pagdinig tungkol sa mga impeachment complaint laban sa Bise Presidente, lalo na sa usapin ng Statements of Assets, Liabilities and Net Worth (SALN).
Isa si Ortega sa mga nag-endorso ng isa sa dalawang impeachment complaint na idineklarang sapat sa porma at nilalaman ng komite. Ayon sa kanya, may basehan ang alegasyon ng unexplained wealth sa naturang reklamo.
“Former Deputy Ombudsman Melchor Arthur Carandang was directly involved in high-level investigations that required examining bank transaction records, including those obtained from the Anti-Money Laundering Council (AMLC) in connection with the financial transactions of former President Rodrigo Roa Duterte and accounts reportedly linked to members of his family, including VP Sara,” ani Ortega.
Dagdag pa ni Ortega na makakatulong ang karanasan ni Carandang sa pagsusuri ng mga financial documents upang mas maunawaan ng komite kung paano sinusuri ng mga imbestigador ang bank records kasama ng SALN disclosures.
Si Carandang ay nagsilbing Overall Deputy Ombudsman mula 2013 hanggang 2019 at kabilang sa mga senior official na namahala sa malalaking corruption investigation sa Ombudsman.
Noong 2017, naging laman siya ng balita matapos kumpirmahin na nakakuha ang Ombudsman ng bank transaction records mula sa Anti-Money Laundering Council bilang bahagi ng imbestigasyon sa plunder complaint na inihain ni Antonio Trillanes IV laban kay dating Pangulong Rodrigo Duterte at sa ilang miyembro ng kanyang pamilya. Naging pangulo si Duterte mula 2016 hanggang 2022.
Ang pagbubunyag na ito ay nagresulta sa mga administrative complaint laban kay Carandang dahil umano sa paglabag sa pagiging kumpidensyal ng bank information.
Kalaunan, iniutos ng Office of the President of the Philippines ang kanyang pagtanggal sa serbisyo noong 2018 dahil sa umano’y misconduct at paglabag sa confidentiality rules, na kinumpirma rin ng Office of the President noong 2019.
Ayon kay Ortega, makakatulong ang testimonya ng mga eksperto na may karanasan sa high-level corruption investigations sa fact-finding work ng justice committee.
“Financial investigations are technical. They involve examining asset declarations, financial documents and bank records. Someone with experience in conducting these investigations can help the committee understand how such evidence is evaluated,” aniya.
Ang pagdedeklara na sapat sa porma at nilalaman ang dalawang impeachment complaint laban sa Bise Presidente ay mahalagang yugto sa proseso dahil magsisimula na ang pagdinig ng ebidensya at testimonya ng mga testigo.
Matapos ang desisyon, inatasan ng justice committee si Duterte na magsumite ng kanyang verified answer sa mga reklamo at magbigay ng kopya sa mga complainant sa loob ng 10 araw.
Kapag natanggap na ang kanyang sagot, susunod na tatalakayin ng komite ang determination of probable cause, kung saan susuriin ng mga miyembro ang ebidensya at argumento ng magkabilang panig bago magpasya kung irerekomenda ang mga reklamo sa plenaryo ng House of Representatives of the Philippines para sa karagdagang aksyon. RNT/MND
