MANILA, Philippines – Nagpadala ang Office of the Vice President (OVP) ng food truck sa General Santos City upang tulungan ang mga frontliner na kasali sa search, rescue, at retrieval operations matapos ang magnitude 7.8 na lindol sa Mindanao.
Ayon sa OVP, sa pamamagitan ng Disaster Operations Center at Southern Mindanao Satellite Office, nagbibigay sila ng mainit na pagkain sa mga tumutulong sa pagtugon sa sakuna.
Naka-station ang Kalusugan Food Truck malapit sa gumuhong supermarket sa Barangay Calumpang, General Santos City.
“The Office of the Vice President recognizes the dedication and sacrifice of our frontliners who continue to serve under difficult and hazardous conditions,” ayon sa OVP.
Dagdag pa ng ahensya, handa rin silang magbigay ng karagdagang tulong para sa relief at recovery efforts sa mga apektadong komunidad.
Ayon sa Office of Civil Defense (OCD), umabot na sa 37 ang nasawi, 456 ang sugatan, at apat ang nawawala dahil sa lindol na tumama sa karagatang sakop ng Sarangani.
Patuloy ang search, rescue, at retrieval operations sa General Santos City at Sarangani, na kabilang sa mga pinakaapektadong lugar. RNT/MND
