MANILA, Philippines – Pinuna ni Senador Loren Legarda ang P150 milyong proposal ng Department of Information and Communications Technology para sa subscription sa Starlink para sa libreng Internet access lalo na sa mga liblib na lugar.
Sa kabila nito, nilinaw ng DICT na ang proposal na natanggap ng opisina ni Legarda ay overpriced, unsigned at unauthorized.
Sa pagdinig ng Senate Committee on Finance sa proposed budget ng DICT para sa 2026, sinabi ni Legarda na nakatanggap siya ng proposal mula sa ahensya ng umano’y P150 milyon na kailangan para bumili ng mga bagong Starlink kit.
Ito ay kasunod lamang ng pagkakapaso ng monthly Starlink subscription sa Antique.
“Nag-expire lang po yung monthly subscription recently and when it expired, ang tanong ko lang po simple, ‘Paano na yung mga health centers, mga eskwelahan na recipient ng Starlink technology?’ Ang sagot ng office niyo at regional office na may proposal na binigay sa staff ko… Nagtaka ako bakit ang mahal, mahal?” tanong ni Legarda.
“Sabi kailangan daw bumili o mag-GAA provision ulit ako ng P150 million para sa site. Sabi ko bakit ganun? Dapat monthly subscription lang, unless I’m ignorant in engineering and every year you have to buy new digital infrastructure. I was only asking for a renewal of the monthly subscription,” dagdag pa niya.
Ipinaliwanag naman ni DICT Secretary Henry Aguda na ang proposal na ipinadala sa staff ni Legarda ay hindi pirmado at hindi rin awtorisado.
“That’s exactly why they are unauthorized to give you those proposals po. Because that’s not along the department orders that I released. One, that is overpriced and I cannot express strong enough, masyadong mahal ‘yan,” ani Aguda.
Kasunod ng paglilinaw ni Aguda, sinabi ni Legarda na ang kanyang opisina ay hihingi ng mas malalim na paliwanag patungkol sa proposal at kung paano ito nakarating sa kanyang desk.
“May I request, with the permission of the chair, for a more detailed explanation for my office on how it happened and an acknowledgement that this is a government document even if it is unsigned, because it’s from the project directors of the free WiFi program,” ani Legarda.
“They are both project managers of the free public internet access program not of my province but of the central office,” dagdag pa.
Siniguro naman ni Aguda na iniimbestigahan na ng internal audit ng DICT ang naturang isyu.
“And we’ve already submitted findings, recommendations to COA. If Mr. Chair and your honor would like, we can give regular updates on the status of the ongoing investigations,” sinabi ni Aguda. RNT/JGC
