MANILA, Philippines – Inaresto ng mga awtoridad ang dalawang indibidwal matapos makuhanan ng P160,000 halaga ng illegally sourced lumber sa joint anti-illegal logging operation sa Occidental Mindoro ngayong Lunes, Hunyo 1.
Ang operasyon ay pinangunahan ng Department of Environment and Natural Resources (DENR) at Santa Cruz Municipal Police Station (MPS), sa Sitio Masaya, Barangay Alacaak, Santa Cruz, kasunod ng pakikipag-ugnayan sa Community Environment and Natural Resources Office (CENRO)-DENR Sablayan at lokal na pulisya para ipatupad ang forestry laws sa lugar.
Naharang ng mga awtoridad ang isang Isuzu Elf closed van sa barangay road at nadiskubre ang mga karga nitong Malugay wood.
Bigong makapagpresenta ang mga suspek ng kaukulang transport permits, proof of ownership, at iba pang dokumento para sa pagbibiyahe ng forest products.
Inaresto ang dalawa sa paglabag sa Presidential Decree No. 705, o Revised Forestry Code of the Philippines.
Kabilang sa mga nakumpiskang item ay ang 50 piraso ng Malugay sawn lumber, na may sukat na 2x6x20, at total estimated volume ng 1,000 board feet at market value na P160,000. RNT/JGC
