MANILA, Philippines – Mahigit 2.1 milyong halaga ng shabu ang nasamsam ng mga awtoridad sa isang tulak ng droga sa ikinasang buybust operation sa Caloocan City.
Kinilala ni Northern Police District – District Drug Enforcement Unit (NPD-DDEU) Chief PLTCOL Timothy Aniway ang naarestong suspek na si alyas “Boss”, 54, residente ng Brgy. 176.
Sa kanyang ulat kay NPD Acting District Director P/Col. Josefino Ligan, sinabi ni Lt. Col. Aniway na positibo ang nakatanggap nilang impormasyon hinggil sa malakihan umanong pagbibenta ng shabu ng suspek.
Nang magawa ng isa sa kanyang mga tauhan na makipagtransaksyon sa suspek, agad bumuo ng team si Lt. Col. Aniway saka ikinasa nila ang buy bust operation sa koordinasyon sa PDEA.
Agad sinunggaban ng mga operatiba ng DDEU ang suspek matapos tanggapin ang markadong salapi mula sa isang pulis na nagpanggap na buyer dakong alas-4:47 ng madaling araw sa Phase 3, Package 2, Lot 1, Block 52, Barangay 176, Bagong Silang.
Nakumpiska ng mga operatiba ng DDEU sa suspek ng nasa 320 grams ng hinihinalang shabu na may katumbas na halagang P2,176,000 at buy bust money.
Sasampahan ng DDEU ang suspek ng kasong paglabag sa Sections 5 at 11 sa ilalim ng Articla II ng RA 9165 (Comprehensive Dangerous Drugs Act of 2002) sa piskalya ng Caloocan City. Rene Manahan
