P25M ketamine nasabat sa Clark airport

MANILA, Philippines – Nasabat ng mga awtoridad ang higit ₱25 milyong halaga ng ketamine sa Clark Freeport Zone noong Miyerkules, Hulyo 30, sa isang operasyon.

Ayon kay Police Regional Office–Central Luzon chief Brig. Gen. Ponce Rogelio Peñones Jr., ang parcel ay idineklarang “data cable roll” at nagmula sa Lier, Belgium.

Nakapangalan ito sa isang residente ng Rodriguez, Rizal. Nang siyasatin, nadiskubre ang mahigit limang kilo ng ketamine, isang ilegal na party drug.

Walang naaresto, ngunit nagsampa na ang awtoridad ng kaso sa ilalim ng RA 9165 para sa ilegal na pag-aangkat ng droga. Isinumite na sa PDEA lab ang mga sample para sa pagsusuri.

Ayon kay Peñones, bunga ito ng matibay na pagtutulungan ng mga ahensya at patuloy ang pagbabantay sa Central Luzon laban sa iligal na droga. RNT