MANILA, Philippines – Nasa apat na kilo ng shabu na nagkakahalaga ng P27.2 milyon ang narekober sa buy-bust operation sa Barangay Bulacao sa Cebu nitong Biyernes, Oktubre 9.
Naaresto naman sa operasyon ang tatlong hinihinalang tulak.
Kinilala ni Philippine Drug Enforcement Agency-Central Visayas Director Joel Plaza ang suspek ng operasyon na si Joseph, 33-anyos na vendor mula sa Talisay City, Cebu.
Si Joseph ay naaresto kasama sina Eduardo, 24, at pamangkin nito na si Harold, 25, na kapwa mekaniko at residente ng Datagon, Pamplona, Negros Oriental.
Naka-detain na sa PDEA-7 headquarters sa Lahug, Cebu City ang mga suspek at nahaharap sa reklamong paglabag sa Sections 5 (Sale of Dangerous Drugs) at 11 (Possession of Dangerous Drugs), Article II, ng Republic Act No. 9165. RNT/JGC
