MANILA, Philippines – Nasa 100 milyong kilo ng bigas na nagkakahalaga ng P29 kada kilo ang ibebenta sa Kadiwa ng Pangulo centers sa Agosto, sinabi ng National Irrigation Administration (NIA).
Ayon kay NIA chief Eduardo Guillen, ang proyekto ay bahagi ng contract farming program ng ahensya na sumasaklaw sa humigit-kumulang 40,000 ektarya ng lupa sa buong bansa.
“Ang aming estimate diyan, mga nasa 29 pesos puwede na kaming magbenta, by August naman kami. Mayroon kaming humigit-kumulang 100 milyong kilo ng bigas na inaasahang ma-produce po natin sa Agosto,” sabi ni Guillen sa isang press briefing sa Palasyo.
Sinabi niya ito pagkatapos ng bigas na nagkakahalaga ng P20 kada kilo ay naibenta sa mga sentro ng Kadiwa.
Naging posible umano ito sa pamamagitan ng mga inisyatiba ng kanilang mga katuwang na irrigators associations, dagdag pa niya.
“Sabi nila noong kinakausap ko sila, bilang pasasalamat nila sa napakarami nilang tinatanggap na mga ayuda sa gobyerno natin, nag-o-offer din sila ng 20 pesos na bigas,” aniya pa. RNT
