MANILA, Philippines – Nasamsam ng mga awtoridad ang nasa P705 milyong halaga ng assorted na pekeng pabango at cosmetic products sa Valenzuela City.
Sa pahayag nitong Sabado, Abril 11, sinabi ng Philippine National Police (PNP) na ikinasa ang operasyon sa Nicewheel Rubber Corporation at Haiwan Import/Export Corporation, sa 90D Bonifacio Street, Barangay Canumay East bandang 8:30 ng gabi.
Pinangunahan ng CIDG-Northern District Field Unit ang operasyon kasama ang Bureau of Customs (BOC), Department of Trade and Industry (DTI), Northern Police District (NPD), Philippine Coast Guard (PCG), at mga opisyal ng barangay.
Nakita sa inisyal na inspeksyon sa warehouse ang bulto-bultong pekeng cosmetics at luxury-inspired perfumes na may marka ng ilang foreign brand at nagkakahalaga ng P705,168,000.
Naroon ang caretaker ng warehouse at security guard nang isagawa ang pag-inspeksyon sa mga produkto at pagkumpiska sa mga ito.
Ang raid ay bunsod ng impormasyon mula sa Office of the Secretary of the Interior and Local Government (SILG) tungkol sa illegal na importasyon ng mga produkto.
Sinundan ito ng serye ng surveillance activities ng mga awtoridad.
Kasunod ng kumpirmasyon ng illegal na aktibidad, nakipag-ugnayan naman ang CIDG sa BOC para sa paglalabas ng Letter of Authority, na pirmado ni Customs Commissioner Ariel Nepomuceno.
Tinukoy ng PNP ang mga suspek na sina alyas “Allen,” isang Chinese, at hindi pa tukoy na kasabwat.
“This is a major blow to syndicates undermining our economy. Hindi lang ito usapin ng buwis; we are protecting our local industries from unfair competition. We will not allow the Philippines to be a haven for illegal goods,” ani PNP Chief Police General Jose Melencio Nartatez Jr.
“Our intelligence suggests this isn’t just a local operation. Maaaring isang malaking supply chain ito. Hinihimay na natin ang mga dokumento para matunton kung saan-saang mga mall at online shops ito dinadala. No one is safe from our follow-up operations,” dagdag pa niya.
Ayon sa PNP, ang mga sample ng nakumpiskang items ay ipinasa sa DTI para beripikahin kung ang mga ito ay tumutugon sa mandatory certification requirements, katulad ng Philippine Standard (PS) Quality at Safety Mark o Import Commodity Clearance (ICC) sticker.
Isasagawa rin ang quality control verification upang masigurong ang mga produkto ay pasok sa Philippine National Standards (PNS) bago ang distribusyon.
“These uncertified products might also be dangerous. Walang clearance from regulatory agencies kaya hindi natin alam kung anong kemikal ang hinalo rito. Pwedeng magdulot ito ng malalang skin allergies o lason sa katawan. We are saving our consumers from potential hospital bills and long-term health issues,” ani Nartatez.
Ang mga nakumpiskang items ay kasalukuyang nasa kustodiya ng BOC para sa safekeeping.
Nahaharap naman ang mga suspek sa reklamong paglabag sa Republic Act No. 7394, o Consumer Act of the Philippines, na kasalukuyang inihahanda at ihahain sa
Office of the City Prosecutor sa Valenzuela. RNT/JGC
