MANILA, Philippines – Inilabas ni Speaker Faustino “Bojie” Dy III nitong Miyerkules, Oktubre 22 ang kanyang Statement of Assets, Liabilities, and Net Worth (SALN), at idineklara ang net worth na P74 milyon.
Kasabay nito, inanunsyo rin ni Dy ang pagtatatag ng SALN Review and Compliance Committee ng Kamara na bubuo ng panuntunan sa pagsasapubliko ng mga SALN ng miyembro ng Kamara ayon sa Republic Act 6713 o Code of Conduct and Ethical Standards for Public Officials and Employees.
Inilista ni Dy ang nasa P32.53 milyong halaga ng assets kabilang ang 11 agricultural lots, isang residential lot, at tatlong residential houses.
Sa 15 real properties, minana ni Dy ang dalawang agricultural lots at dalawang residential houses.
Sa personal properties, naitala naman ni Dy ang kabuuang P88.6 milyon.
Sa nasabing bilang, P27.5 milyong ang investment at P25 milyon ang cash.
Idineklara rin ng Speaker ang nasa P12 milyong halaga ng alahas at iba pang personal items bilang personal property; P10 milyon para sa warehouse farm improvement; P3.6 milyon na Toyota Alphard van; P2.8 million Toyota LC 76 Series, at iba pa bilang personal properties.
Umaabot naman sa P47.1 milyon ang liabilities ni Dy. Ito ay ang P40 milyong halaga ng accounts payable at P7.124 milyong halaga ng agricultural loans.
Bukod kay Dy, naglabas din ng kanilang SALN sina Akbayan party-list representatives Chel Diokno, Percival Cendaña at Dadah Ismula, Dinagat Rep. Arlene “Kaka” Bag-ao, ACT Teachers party-list Rep. Antonio Tinio, Gabriela party-list Rep. Sarah Elago, Kabataan party-list Rep. Renee Co at Cavite Fourth District Rep. Francisco “Kiko” Barzaga. RNT/JGC
