MANILA, Philippines – Nagbiro si Sen. Robinhood Padilla na maaaring “ma-miss” niya ang kanyang mga kasamahan sa Senado habang papalapit ang kanyang pagharap sa Department of Justice (DOJ) kaugnay ng obstruction of justice complaint laban sa kanya.
Sa ika-29 araw ng impeachment trial ni Vice President Sara Duterte nitong Miyerkules, nabanggit ni Padilla ang kanyang nakatakdang pagdinig sa Biyernes, Setyembre 25.
“Baka ito na rin ang huli ko ditong araw e. Hindi ko na alam e,” ani Padilla.
“Ang hearing ko sa Biyernes na. Hindi ko alam kung ano pa ang susunod. Baka ma-miss ko na kayo,” dagdag niya.
Nauna nang pinadalhan ng DOJ ng subpoena si Padilla at iba pang respondent upang humarap at magsumite ng counter-affidavit sa Setyembre 25 at Oktubre 9 kaugnay ng reklamo ng PNP-CIDG na obstruction of justice.
Iniuugnay ang reklamo sa alegasyong tumulong si Padilla kay Sen. Ronald “Bato” dela Rosa na makaalis sa Senate compound noong Mayo habang may umiiral na arrest warrant laban kay dela Rosa mula sa International Criminal Court. Itinanggi ni Padilla na tumulong siya sa pagtakas at sinabing sumakay lamang si dela Rosa sa kanyang sasakyan.
Nauna ring sinabi ng DOJ na tungkulin nitong aksyunan ang mga reklamong inihahain dito at bigyan ng pagkakataon ang mga respondent na magsumite ng kanilang sagot at ebidensiya.
Wala pang desisyon ang DOJ sa reklamo, at ang nakatakdang pagharap ni Padilla ay bahagi pa lamang ng preliminary investigation.
